Gegurita Lomba Bulan Bahasa

Geguritan Pilihan

GRIMIS ESUK

Dening: Emi Sudarwati

Esuk iki

Grimis kadya disuntak alon-alon

Angen-angen pating pencolot

Mbrubul saka jroning sacingkir kopi putih

Legi manis, mapag tekaning imajinasi

Mumpung esuk iki prei mulang

Apa kleru yen aku nyerat pangangen

Kang banjur daksampirake ing pang-pang teles

Supaya bisa nyebar tumekaning manca

Nemoni sedulur temu rina

Muncrat nglumpati kadang konang

Bukuku miber menyang Malaysia.

Baureno, 27 Juli 2017

Kapetik saka Buku Kanca Selawase

Antologi Geguritan Emi Sudarwati lan Siswa Kelas 7F SMPN 1 Baureno Taun Pelajaran 2017-2018

MONUMEN

Dening: Emi Sudarwati

Dhek wingi aku isih bisa nyawang

Ngadeg jejeg, gagah prakasa

Ing satengahe kutha

Nyapa aruh sapa wae sing liwat kana

Mesem edi, marak ati

Karya pujangga tan kena tinumbas arta

Nanging saiki

Kang mbaureksa meksa mbubrah

Monumen kuwi ndhepani bantala

Kalindhes adigunge kuwasa

Tanpa sisa

Ngilangake sejarah

Mung kanggo nyathet sejarah anyar

Saiki aku bisa nyawang monumen seje

Ngadeg jejeg, nantang kang padha mara mrene

Sapa sira, sapa ingsun

Aji mumpung

Dhuh Gusti....

Mugya tansah paring pituduh

Mring para pangemban pangembating praja

.

Baureno, 7Januari 2020

Kapetik saka Buku 20 November 2020 (20 Puisi Umi &20 Gurit Emi)

MITRA SAMIN

Dening: Emi Sudarwati

Mitraku sinebut Wong Samin

Minangka cecitraning kamardikan jati

Paring tanpa pamrih

Tan maelu timbal balik

Nadyan tansah dianggep cidra tur ala

Mitraku, ora dadi ngapa

Apa artine mahkota kanggomu?

Mitraku tak butuh kursi dampat kencana

Apa arti donya brana kanggomu?

Mitra Saminku tan butuh emas picis raja kaya

Jujur, jujur lan jujur

Kabeh kuwi kanggomu ngluwihi donya brana lan kalungguhan

Watak wantumu kadya mercusuar

Handadekake aku tansah mongkog

Lathimu kuwi minangka atimu

Tanpa ngilmu, ananging lurus laku

Nangkis prasangka

Ngugemi budaya adi luhung

Sanajan akeh kang ngendha kuna

Tebuh mring gebyaring bumi loka

Nanging mitraku

Kanggoku, sliramu mulya ing bebrayan agung

Ndonya tumekaning delahan.

Baureno, 3 September 2020

Kapetik saka Buku 20 November 2020 (20 Puisi Umi &20 Gurit Emi)