Widodo Basuki
MLESAT BARENG UKARA
ukara iki lumesat
menyang langit!
nepusi laladan-laladan sing tan kinira
tan kajangka sadurunge
jalaran ukara ngungkuli nalar
ora tak bayangake dinane
kaya dina iki!
seje karo dina-dina
liyane, beda karo wengi-wengi
liyane, wektu-wektu uga
ora padha!
wis dak rajut
gelang karet kang njepretake
panah sasada lanang
dak tembus impene bocah cilik
kang mbuntoni dalan
lan aku weruh srengenge !
kaya ing wengi jaman cilikan kae
wujude mung pindha samrica kabubut
ning wus mancorong anelahi
kuwawa madhangi jembare jagad
2012
